Nagkainitan hanggang sa nauwi sa suntukan ang naging alitan sa pagitan ng isang taxi driver at isang truck driver dahil umano sa gitgitan sa kalsada sa Mandaue City, Cebu.
Sa kuha ng video na kumalat sa social media, nakahinto ang taxi habang nasa gilid nito ang truck driver na nakaberde at maya-maya pa, umandar ang taxi kahit nakabukas ang pinto sa passenger side.
Sumunod naman ang truck driver at sumampa sa gilid ng taxi, bago pinilit na hilahin palabas ang taxi driver.
Nang hindi niya ito mahila, pinaghahampas na ng truck driver ang taxi driver.
Lumabas ang taxi driver at humantong na ito sa suntukan.
Inilahad ng Mandaue City Traffic Office na nagkausap rin ang dalawang driver at nagkasundong hindi na sila magsasampa ng reklamo laban sa isa’t isa.
