Pahabol na Christmas gift ang natanggap ng dalawang maswerteng mananaya matapos nilang tamaan ang winning numbers ng Ultra Lotto 6/58 at Megalotto 6/45.
Mahigit kalahating bilyong pisong jackpot ang iuuwi ng mananaya sa Ultra Lotto 6/58.
Batay sa website ng Philippine Charity Sweepstakes Office, isa lang ang nanalo sa naturang lotto game na may digit combination na 19-35-25-42-58-05, na may kabuuang premyo na P571,554,916.40.
Bukod dito, isa pang mapalad na mananaya ang masaganang sasalubungin ang Bagong Taon matapos niyang masapul ang P23 milyon jackpot sa Megalotto 6/45.
Siya lang din ang mag-isang tumama sa digit combination na 06-12-28-04-16-17, na may kabuuang jackpot prize na P23,333,389.60.
Samantala, wala pa ring tumatama sa Superlotto 6/49 na mahigit P20 milyon ang premyo, 6D Lotto na mahigit P3 milyon ang premyo, at Grand Lotto 6/55 na halos pumalo sa P558 milyon ang premyo.
