Natiklo ng mga otoridad ang isang lalaki na nagtangkang magnakaw ng alak at shampoo sa isang grocery store sa Bacolod City nitong nakaraan at ang dahilan umano ng suspek kaya nagnakaw ay dahil kailangan niya ng gamot para sa kaniyang ngipin.
Sa kuha ng CCTV, makikitang sinunggaban at hindi na binitawan ng guwardiya ang suspek palabas ng grocery store at kahit nagpumiglas ang lalaki at muntik pa silang matumba, hindi kumalas ang guwardiya sa kaniyang pagkakakapit.
Bago nito, sinabi ng guwardiya na tinangka umano ng suspek na nakawin ang ilang paninda.
Sinabi ng isa pang empleyado na hindi ito ang unang pagkakataon na ninakawan sila ng suspek na isa palang shoplifter sa tindahan, at may dala-dala pa noong patalim.
Kinilala ang suspek na si Salmino Grijaldo Jr., na umamin sa pagnanakaw at paliwanag ng suspek, nagawa niya lamang ito para sa gamot sa kaniyang sumasakit na ngipin. Ngunit ang kaniyang ninakaw, alak at ilang sachet ng shampoo.
Nakabilanggo na sa Bacolod City Police Station ang suspek, habang desidido ang pamunuan ng grocery store na magsampa ng kaso laban sa kaniya.
