Inamin ng aktres at TV host na si Maja Salvador na natupad na umano ang kanyang hiling na makilala at makita ang kanyang tunay na ama na matagal din niyang hinanap although hindi rin matutuloy ang kanilang pagsasama.
Ang siste kasi, may sarili na itong pamilya kaya medyo naging “complicated” para sa kanila ang mga sumunod na pangyayari.
Sa panayam ng “Fast Talk with Boy Abunda” kay Maja napag-usapan nga ang tungkol sa tatay niya. Pagbabalik-tanaw ni Tito Boy, nabanggit sa kanya ng dalaga noon ang kagustuhan nitong makita nang personal ang kanyang tatay.
Kung hindi raw nagkakamali ang veteran TV host, 14 years old pa lang si Maja nang makilala niya ito na inilarawan pa niyang napakasimpleng dalagita na maraming pangarap sa buhay kabilang na nga riyan ang makita ang ama.
“Narito pa rin siya, ‘yung hindi nawawala ‘yung mangarap kasi para sa akin kapag natupad na itong isang pangarap na ito, hindi pa rin siya natatapos,” sabi ni Maja sa panayam. “Ang maramdaman ko kung paano ang magkaroon ng isang tatay sa bahay, forever ‘yun Tito Boy.”
“Kung hindi ko siya maramdaman, yung makita ko lang ‘yung tatay ko. ‘Yung masabi ko lang sa mga kaibigan ko, sa mga kaklase ko na, ‘May tatay din ako, ‘di ko lang siya kasama pero may tatay ako,’” dagdag pa ng dalaga.
Natupad naman daw ito, pero hindi nagtuluy-tuloy ang kanilang komunikasyon.
“Hindi po siya nagtuloy-tuloy kasi may ibang pamilya na rin ang tatay ko. Sakto lang pero masaya na ‘yung puso ko na nakilala ko siya,” sabi ni Maja.
Samantala, tuloy na tuloy naman ang kasal nina Maja at Rambo Nuñez sa darating na July. Isa sa mga tatayong ninong nila ay si Bossing Vic Sotto.
