Excited na ang aktres na si Jennylyn Mercado sa kanyang nalalapit na pagbabalik-telebisyon matapos ang halos dalawang taon na pahinga mula sa showbiz industry at ang aktres mismo ang nagkumpirma ng kanyang pagbabalik.
Kung matatandaan, nagpost ang aktres sa kanyang social media ng isang teaser photo na ipinapakita ang isang bagong female celebrity ng talent management na Aguila Entertainment.
“Excited to welcome a new sister… [heart emoji],” saad ni Jennylyn sa kanyang caption.
Samantala, makikita naman sa comment section ng post ang tanong ng isang netizen na ang sabi ay “Lods Jennylyn Mercado, balik taping ka na po ba sa Love Die Repeat ? Ipupush paba?”
Masayang sagot naman ng aktres sa kanya, “yes [happy face emoji] naghahanda na ako!”
Dahil sa naging tugon ng Kapuso star ay libo-libong fans na ang hindi na makapaghintay na muli siyang mapanood sa TV.
Ang showbiz comeback ni Jennylyn ay unang ibinalita ng aktres noong nakaraang taon matapos siyang tanungin ng entertainment correspondent na si Nelson Canlas sa isang podcast interview.
Matatandaang noong October 2021 nang mabalitaang nagdadalang-tao si Jennylyn kasabay ng kanyang taping sa GMA teleserye na “Love. Die. Repeat” kaya naman itinigil muna ang pagbuo ng nasabing teleserye at pinagpahinga muna siya.
Isinilang ng aktres ang first baby nila ng aktor na si Dennis Trillo noong Mayo ng nakaraang taon.
