Nag-iimbestiga ngayon ang Food and Drug Administration kaugnay sa nangyayaring bentahan online ng gamot na para sa mga may diabetes pero ginagamit umano ng iba bilang weight loss treatment.
Ayon sa FDA, aprubado nila ang Ozempic para sa mga may type 2 diabetes pero hindi bilang weight loss treatment.
“The product Ozempic is registered with the FDA with the indication of treatment for Type 2 diabetes and with that it is also approved by the FDA as a prescription drug,” saad ni FDA spokesperson Atty. Pamela Sevilla.
Ikinababahala rin daw ng FDA ang pagbebenta nito online nang walang prescription o reseta.
Nagsimula na raw ang imbestigasyon ng FDA kaugnay dito bagamat aminado silang mahirap tukuyin ang mga nagbebenta nito online lalo na sa mga social media platforms kaya naman humingi na raw sila ng tulong sa NBI at CIDG.
“We have to figure out if these are the establishments with license to operate from FDA or these are private persons na walang license to operate with FDA. So with that, we start the investigation by figuring out kung saan muna kumakalat ang products,” sabi pa ni Sevilla.
Paalala ng FDA sa publiko maging maingat sa mga ginagamit na health products at ireport sa [email protected] ang mga prescription drugs na ilegal na ibinibenta online.