Nagkakagulo ang mga dalahira at katkatera dahil sa ginawang paglilinis ni a very good Kathryn Bernardo sa kanyang Instagram bakuran.
Burado na at winalis ni Queen Kath sina Lisa Soberano, Julia Barretto at Gillian Vicencio sa listahan ng mga nilalang na pwede siyang subaybayan sa nasabing social media site.
Sa ginawang ito ni Bernardo, ang matataba ang utal, mapaglaro ang mga imahinasyon at kay huhusay sa malikhaing pagsusulat, ang konklusyon, ang tatlong dalaga ay may naging ugnayan sa dating kasintahan niyang si Daniel Padilla.
Si Gillian, mariin na ang pagtanggi tungkol sa pagiging babae sa dilim ni young master. Nung may pumutok na chika tungkol sa kanilang pagiging malapit ni Daniel, kung saan may rebelasyon pa nga na kulang daw sa taba at haba ang ari-arian nito.
Si Soberano, ang tanging alam ng lahat eh nung ito ay ang pangatlong prinsesa pa dati sa Star Magic Kingdom at Star Cinema, ang after us nina Kath at Nadine Lustre, may mga panawagang itambal kay Daniel sa isang pelikula. Siempre pa, hindi nangyari ang tambalan at nawala na rin ang paghahangad sa isang Liza at Padilla proyekto.
Si Julia, kung ano ang connect the dots nito sa lalaking minahal dati ni Kathryn, tanging si Zaido at ang mga Pulis Pangkalawakan lamang ang may kasagutan.
Ang inaabangan ngayon, ang pag-resbak ng tatlong binibini kay Bernardo. Sino kaya sa kanila ang mag-unfollow rin ? May mga cryptic post kaya silang ibabahagi dahil sa pangyayaring ito? O, hindi nila papatulan ang paandar ni Kathryn kasi nga wala namang silang dapat ipaliwanag, malinis ang kanilang budhi at konsensya.
At si young master, kailan naman kaya niya hindi na susubaybayan ang social media ng dating sinisinta? Ay ito ang tanong na talaga namang kapana-panabik ang magiging kasagutan, sa totoo lang.
***
Pangmalakasang trending tipix muli ang Kapamilya teleseryeng “Senior High,” na tumabo na sa dalawang bilyong views sa TikTok, dahil nga pangabog ang mga kaganapan sa senior prom ng mga taha-Northford Academy.
Ang mga pinag-usapan ng husto sa prom, ang pagdalo ni Jared (SB19’s Justin De Dios) bilang date ni Sanya (Gela Atayde). Nagkaroon ng closure sina Tim (Zaijan Jaranilla) at Roxie (Xyriel Manabat). Proud and out na si Tim at Poch (Miggy Jimenez) sa kanilang boys love. Nag-first dance sina Roxie at Archie (Elijah Canlas). At may true love’s kiss moment sina Sky (Andrea Brillantes) at Obet) Kyle Echarri. At oo, nagwala at panira ng moment ng lahat si Zaira (Daniela Stranner) na minumulto ni Luna.
Pagkatapos ng mga lambingan at lambutsingan sa prom, titindi naman ang mga damdamin dahil si Sky, pag-aagawan nina Obet at nina Obet at Gino (Juan Karlos Labajo), ang dating mga nobyo ni Luna.
Dapat din abangan ng mga manonood ang sunod-sunod na paputok, ang mga baho nina Harry at William (Baron Geisler at Mon Confiado) na maaaring magdulot ng mas malaking sigalot sa pagitan ng kani-kanilang mga pamilya at siempre pa, ang pinaka-aabangan ng lahat, matutukoy na kung sino talaga ang tumulak kay Luna sa building na siyang dahilan ng pagkamatay nito.
Naku, naku, naku, mas matindi talaga ang huling dalawang linggo ng “Senior High” kaya huwag palampasin ang “ender to remember” finale ng “Senior High” ngayong Enero 19 ng 9:30 p.m. sa Kapamilya Channel, A2Z, TV5, iWantTFC, at Kapamilya Online Live sa YouTube channel at Facebook page ng ABS-CBN Entertainment.
