Isang driver ng closed van ang nasawi matapos itong sagasaan ng nakaalitang driver naman ng isang 16-wheeler truck sa Mel Lopez Boulevard sa Maynila nitong Biyernes ng umaga.
Base sa paunang imbestigasyon, nagsimula umanong magkagitgitan ang suspek na nagmamaneho ng trailer truck at biktimang driver ng aluminum van sa C-3, Navotas.
Nang makarating sa Smokey Mountain, bumaba ang biktima para kausapin sana ang truck driver. Pero imbes na bumaba rin, sinasagasaan umano ng truck driver ang biktimang dinala pa sa ospital pero binawian din ng buhay.
Hawak na ng MPD Homicide Division ang suspek na mahaharap sa kasong murder.
Ayon naman sa kaanak ng biktima, hindi na dapat payagan pang humawak ng manibela ang suspek dahil demonyo umano ito sa kalsada.
Samantala, patay ang isang lalaki matapos siyang pagbabarilin nang malapitan ng dalawang salarin sa Binangonan, Rizal.
