Dinakip ng pulis ang aktor na si Ricardo Cepeda dahil sa kasong syndicated estafa nitong Sabado.
Dinampot ng mga tauhan ng Criminal Investigation and Detection Unit ng Quezon City Police District si Richard Go, ang tunay na pangalan ng aktor, alas 11 ng umaga sa bahay sa Mabini Street, Maypajo, Caloocan City.
Inaresto ang 58-taong-gulang na aktor, na nakatira sa San Antonio Street, Pasig City, sa bisa ng arrest warrant mula sa Regional Trial Court Branch 12 ng Sanchez Mira, Cagayan.
Ang hukom na si Gemma P. Bucayu-Madrid ang nag-isyu ng warrant laban sa aktor.
Ayon sa hepe ng QCPD-CIDU na si P/Maj. Don Don Llapitan, kasong estafa ang kinakaharap ni Go at kanilang aabisuhan ang RTC 12 sa pagkaaresto niya.
