BINOGA ng isang naalimpungatang mister ang kanyang misis sa loob ng kanilang bahay sa isang barangay sa siyudad ng Baguio.
Hindi tinukoy ng pulisya ang lokasyon, mga pangalan ng suspek na mister at misis na biktima na nakaligtas naman at kasalukuyang nagpapagaling sa ospital.
Batay sa ulat ng Baguio Police,natutulog ang mister sa sofa sa kanilang sala nang bigla siyang bumangon dahil may humawak sa kanyang paa.
Dahil naalimpungatan, bigla niyang kinuha ang kanyang baril at ipinutok sa taong nasa harap niya.
Hindi umano nakilala ng mister na ang taong kanyang binaril ay ang kanyang misis na kinakapa ang switch ng ilaw sa kanilang bahay.
Madilim kasi kaya inakala umano ng mister na may nakapasok na magnanakaw sa kanilang bahay.
Nang matuklasan na ang misis niya ang kanyang binaril, agad niya itong sinugod sa ospital sanhi ng tama ng bala sa kaliwang paa.
Hindi nagsampa ng kaso ang misis laban sa kanyang mister.
